[PT自費食評] 樓底極高宴會廳食自助餐！龍蝦生蠔毋須排隊？人人話抵食係咪真？
2023年自助餐最後一擊 本身有猶豫過，年尾係咪食一啲 幫襯過嘅餐廳比較有保證 最後都係被好奇心戰勝，揀咗間我哋未拍過片 而坊間又一致好評嘅抵食自助餐 擺晒聖誕裝飾，全場有好多大型聚餐活動 一班親朋戚友就最有氣氛 想知有咩食，就快啲訂閱PT食為先 跟我哋一齊搵食啦 大家好，我係阿Pui，我係泰利 今條片要花啲時間講下餐廳嘅地點 因為佢有幾間差唔多名稱嘅酒店，容易混淆 今次由紅磡火車站出發 認住， 係「都會」呀 喺紅磡，唔係喺黃埔呀 即係賣樓新聞，見到打晒蛇餅嗰度呀 喺正紅館對面，以前唔少海外歌手嚟開演唱會 都會住呢間酒店 就算入到商場裏面都要睇清楚指示牌 唔係去九龍海灣酒店 係喺煌府右手邊，直去 都會海逸酒店 聖誕氣氛好熾熱，6點3左右 好多人已經喺大堂等食 聖誕固然好多親戚朋友要見 但難得有個長假期 亦都係留喺屋企煲劇嘅好時機 而家啲網上串流平台好方便 你估仲係以前一到長假，要鬥快去租碟鋪 因為碟就得幾隻咋嘛，想睇熱門戲就要爭 而家足不出戶，已經有個極大量嘅網上片庫 但唔知大家有冇試過 有啲電影同劇集想撳出嚟睇 先發現原來鎖咗區，要某啲地區限定先睇得到 咁呢個時候就需要申請NordVPN VPN即係虛擬私人網絡 你可以將你嘅虛擬位置轉去其他國家或者地區 撳一個掣，你想做美國人又得 做阿根廷人又得 唔係喎，嗰支好似係危地馬拉嘅國旗 總之，睇咩片都暢通無阻 又或者你飛咗去外地 想睇返香港限定嘅影片 NordVPN又可以大派用場 而且不論iPhone定係Android都有專屬手機App 簡單易用，就算操作上有咩疑難 NordVPN都有24小時全天候嘅客戶支援服務 而家快啲打開影片資訊欄，用我嘅連結申請 nordvpn.com/puiterry 有獨家優惠 30日內唔滿意，保證原額奉還 咁仲唔快啲試下 有啲影片要翻牆先睇到 但好彩呢一刻我哋個Channel仲健在
快啲返去繼續食嘢啦 跟住就交畀現場嘅阿Pui報道喇 裏面係一個宴會廳嘅模樣 張張櫈都笠晒套，好似擺酒咁 唔知點解，夜媽媽都拉埋窗簾 明明有個咁靚嘅夜景，點解要收埋收埋喎 樓底好高，不過好應聲 過時過節就係要呢種氣氛吖嘛 咦，咁新年之後嗰啲日子點算呢？ 點樣證明我哋係自費實測 睇下我哋坐咩枱就知 喺廚餘收集處嘅旁邊 好，正式睇下個取餐區 同用餐區有明顯區間，要行幾步樓梯 通道好闊落，帶住細路仔出去都唔會撞到人 我哋首先睇中 入口附近嘅刺身 6點半啱啱開始，未有人排隊 款式唔錯，竟然有北海道帶子 平時係900幾蚊嘅貴價自助餐先有㗎嘛 馬刀貝食佢嘅爽口 劍魚、吞拿魚、三文魚都係厚切 配偏甜嘅豉油都唔錯 不過估唔到，連三文魚都要限量 莫非呢度嘅食客好大食嘅？ 又唔係帶子、紅蝦 阿根廷紅蝦喺黃埔嗰間九龍海逸君綽酒店都有供應 今次食都唔覺得佢腥，食得過 帶子肉質會比較實，唔可以同上次麗晶比啦 但應該好過爭鮮嘅 回本位食得過，可惜每次得一件 馬刀貝就可以一次攞三片 另一邊有任攞唔嬲嘅壽司，同埋角切刺身飯 仲有自己撈嘅沙律，配料選擇唔算多 西式冷盤，煙三文魚色澤暗淡 仲有芝士，醃菜，我哋就冇攞到喇 因為有更重要嘅事情等緊我哋呀 冇錯，就係凍海鮮喇 今日雖然接近爆場，8、9成滿 但好多都係一大班人聚餐 醉翁之意不在酒，掛住傾計 唔會排大隊，或者好快就清晒碟 你睇下，都未清碟，又一大盆麵包蟹倒落嚟 龍蝦鉗，唔係間間自助餐有 至於蝦同青口都係常見 龍蝦係任食，不限量 個樣都OK，唔係灰色嘅 啲膏都好多，肉質正常，有海水味 都係嗰句，冇得同麗晶比 但好過唔少自助餐，咬得開，唔係泥膠質感 餐廳如果有獨立一盆龍蝦鉗 通常都會稍微幫你破開 但呢度係冇，你只能靠把鉸剪 最後剪到爛晒，又嘥時間 呢個可能係其中一個技巧，令你唔想攞
冇人攞，咪唔需要補貨囉 麵包蟹就麻麻哋，得個空殼咁滯 係咪蟹蓋先係咁咋？ 但係出面嗰啲賣相更唔討好 莫非因為時候唔啱 蟹腳幾大隻喎 第一節長過一部iPhone 肉質同甜味似貴少少嘅仿蟹棒 彈下彈下嘅，唔會太鹹 蝦都係正常，爽彈嘅 海逸系酒店自助餐嘅一大賣點，係生蠔 每人每次限取兩隻，都好合理 出奇嘅係，咁矜貴嘅食物居然冇人排隊 見到隻蠔嘅真身，大家就明啦 我聽到有食客問個師傅點解啲蠔咁奀 「奀」應該係最適合嘅形容詞 今年食過一間生蠔任攞，質素又唔錯 大家可以撳右上角睇返 另外有一啲泰式前菜 青木瓜沙律同埋酸辣鳳爪 然後呢個角落，有生滾粥同熱葷嘅 炒蜆睇落唔錯，但係全場冇蒸魚食 只有呢個剁椒蒸三文魚頭骨腩，唔太吸引 仲有豬頸肉 咦？呢個好熟面口喎 咪係頭先嘅龍蝦鉗？加咗粉絲炒 呢一個角落嘅燈光昏暗 令到兜清湯牛腩嘅賣相令人卻步 呢幾兜，佢叫做炊飯喎 仲有豆腐，好似喺屋企食飯咁 不如食啲屋企整唔到嘅燒鴨 呢個叫海鮮蟹肉脆棠鍋餅 有一啲中式涼菜 重點嚟喇，係泰式咖哩炒海鮮 雖然啲海鮮又係熟口熟面 但係一打開，係香氣撲鼻 仲配埋麵包畀你㗎 脆棠鍋餅，原來係蝦膠撈咗小棠菜 食落唔會太粉，有少少彈性㗎 包好硬，係咪擺太耐 但個咖哩係唔失禮，泰式黃咖哩有蛋香 某啲凍海鮮本身有強烈鹹味，唔夾咖哩 但係青口係唔錯 粉絲龍蝦鉗煲，個汁好美極，麻麻地 辣椒膏炒蜆夠惹味 蝦頭油蟹肉炊飯，聞落幾香 可以食啲飯填肚 又唔會食白飯咁傻仔 其實啲熱葷我都收貨嘅，選擇又幾多 只係啲海鮮一雞幾味，太明顯太重覆啫 頭先嗰個角落頭，仲放埋飲品 有凍咖啡、凍紅茶、菊花露 有兩部咖啡機，有一壺壺嘅熱茶 不過擺太耐，浸到有啲苦 如果想飲酒、飲果汁，要另外加錢
我哋係經某網上平台買飛 本身已經包咗紅白酒任飲 價錢係 $688 一個人 但12月係聖誕假期，價錢好浮動 睇返官網，1月有7折優惠 平日大約係$590埋單價 紅白酒我哋唔識飲，淨係知道兩杯足以令我頭痛 轉返飲果汁，不過又太甜太假 加唔加錢要任飲就觀眾們自行決定喇 湯方面，有意大利雜菜湯 我哋試咗中湯，蕃茄薯仔排骨湯 本身款式平民，而味道係非常淡 落唔夠料就會有呢個效果 睇完印度食物，仲有啲澱粉質 Pizza，焗薯角等等 螺絲粉望落乾爭爭 原來要自己後期撈汁 去到廚房嗰面 乜嘢係軟殼蟹肉金菇餅 點解咁似大阪燒嘅 又見到老朋友，麵包蟹 今次有胡椒炒，仲有避風塘炒 天婦羅，當然冇炸蝦 炸雞皮就有得你食 突然見到有人群出現 原來係有煎鴨肝 每次限取一份，不過數量好多 食多幾份都冇問題 鴨肝都幾大件，好香脆 不過嚿麵包可唔可以唔好咁硬 擺咗幾耐㗎 肉枱有燒羊同燒牛 Zoom埋去睇睇，啲肉都幾熟下喎 呢碟西西里燴春雞都不遑多讓，熟到乾晒 呢邊算係西餐區 話就話係西餐，但其實都好港式 （一啲都唔似意大利飯） 後尾先知原來係麻辣味嘅意大利飯 仲有煎魚柳，茶餐廳都食得到 頭先講過燒牛肉成條燒柴 你竟然真係攞返嚟食 （好韌，好熟） 我攞咗片黑松露炒蛋多士 之前打風，啲人咪要去超市入定食糧 結果唯一一款口味滯銷，就係黑松露味薯片 證明大家都知道太平價嘅黑松露醬 陣味真係好難頂，寧願餓死都唔食 點解我仲要攞，呢啲係咪叫鬼揞眼 我就醒目，攞咗茶碗蒸 因為佢寫到明係用北海道3.6牛乳 算係少少信心保證 果然茶碗蒸又甜又滑，有奶香 今日唔少菜式都食得出本身食材唔夠靚
最好食估唔到係茶碗蒸 平時我哋都話，甜品先係展示酒店級數嘅環節 呢度都唔例外，展示咗佢嘅級數有幾麻麻 蛋糕望落比較粗糙 同埋啲燈光做乜嘢 係咪想曬黑啲蛋糕，點解要照紫外光燈 望落係完全提唔起意欲 唯獨佢幾有心，聖誕節有整返啲相應主題嘅蛋糕 但同時又有幾款榴槤特色甜品 咩喎？邊個話聖誕唔可以食榴槤？ 中式甜品方面有楊枝甘露 桂圓蓮子茶 有一個椰汁燉燕窩 我可能太早攞，8點時候攞 佢未係好熱，微溫嘅感覺有啲奇怪 食方面，真係唔多吸引 因為蛋糕好唔好食，好大程度要睇用料 牛油唔靚，奶唔靚，咪唔夠香味囉 就算係海逸酒店招牌嘅芒果拿破崙 今日都唔好食，唔酥脆 但係玩方面，其實都滿足到家庭客、細路仔 唔止朱古力噴泉，棉花糖機 仲突然校暗個現場燈光 原來係為咗展現呢個「火焰雪山」 睇下幾多人打卡影相 蛋糕麻麻哋，不如試下即製嘅Crepe 有原味同埋綠色嘅班蘭味 估唔到餐廳為咗縮皮 連煎餅嘅配料都要限你揀2款 要咗芒果同忌廉，就唔可以要埋士多啤梨 冇晒自助餐任食嘅樂趣 睇下煎餅嘅邊緣位置 有好多氣孔，唔滑 就係因為啲蛋漿落唔夠，又要碌到佢咁大塊 結果側邊就唔夠料囉 雪糕有Movenpick，有專人幫你𢳂埋 以為餐廳咁大方，今次原來係配料方面慳錢 啲朱古力碎係冇朱古力味 呢度雖然好似好多嘢揀 但乜都慳住慳住，質素偏低 $600-700呢個價錢有啲尷尬 寧願好似天際萬豪，主攻生蠔，放棄熱葷 或者茶園特價嘅時候，其實仲平過佢添呀 最好食係凍海鮮嘅龍蝦 泰式咖哩個汁、茶碗蒸都唔錯 但係冇乜邊道菜會特別回味 今次介紹嚟到呢度，我哋下條片再見
快啲撳入去 http://nordvpn.com/puiterry ，申請NordVPN，有獨家優惠，仲有30日退款保證！
=======================
我哋係PT食為先，每星期為大家介紹香港美食！鍾意呢段片嘅朋友，記得留言讚好，同埋訂閱我哋Channel，撳埋鐘仔，一有新片就通知你！
Instagram: https://www.instagram.com/puiterry
Youtube: https://www.youtube.com/c/puiterry
#自助餐 #龍蝦 #生蠔 #抵食 #性價比
#PT食為先 #自費食評 #誠實食評 #真人實測
#香港美食 #香港好去處 #香港 #美食
#hkfood #hkfoodie #foodie #yum
=======================
Promenade 西餐廳
地址：紅磡都會道7號都會海逸酒店7樓
7/F, Harbour Plaza Metropolis, 7 Metropolis Drive, Hung Hom
19 Comments
快啲撳入去 http://nordvpn.com/puiterry ，申請NordVPN，有獨家優惠，仲有30日退款保證！
伏伏伏伏, 多謝先講
呢間好多年前質素已經下降.睇片X'MAS食物同平時好似相差不多. 生蠔就夠令人驚………嚇.😅已經好多年無幫襯.
聖誕快樂阿Pui & Terry! 去d buffet地方一見到奀蠔真係超失望，直頭試完2-3隻我就無興趣再食
兩位節日快樂🙏🏻
感覺差咗，呢間嘢以前都食過，有 haagen-dazs雪條供應，而家冇咗😢
其实最伏是用中尚价钱去吃一般水准的自助餐😅
多謝介紹，呢間可以skip😅
吓？好差喎！寧願少D去，去D貴少少的！覺得食左會肚痛咁！
竟然。。。麻辣意大利飯？？？？😅
d都唔靚唔吸引
好差 冇食好耐
打手
6百幾太貴喇，同埋d野太多重複，性價比差太遠，甜品又唔吸引，睇你地咁多自助餐，真心講最垃圾都係呢間，我有d想睇你地介紹尖沙咀ymca個間自助餐
謝謝分享
仲差過茶園，茶園 貴精不貴多
唔吸引
😮😮😮😮😮
網友們有冇邊間平靚正介紹下😊？
呢間人氣非常強勁，但睇條片啲食物真係比較一般，舊燒牛扒睇見都唔開胃，好有名過於實嘅感覺